Ho er ny direktør i Volda

Ann-Kristin Emblem sa opp stillinga si som høgskuledirektør ved Høgskulen i Volda (HVO) 13. mars.

To veker seinare har høgskulestyret vedteke å konstituera Oddrun Rangsæter som høgskuledirektør.

Rangsæter er i dag fakultetsdirektør ved Det juridiske fakultetet ved Universitetet i Oslo.

høgskulen i volda

Høgskule­direktøren har sagt opp: Får prosjekt­stilling i tre år

Startar før påske

I ei pressemelding heiter det at Rangsæter allereie 7. april skal byrja å jobba tjue prosent ved HVO. Frå 1. mai skal ho vera på plass på Sunnmøre i hundre prosent stilling. 

— Eg er svært glad for at Rangsæter har takka ja til stillinga som høgskuledirektør, og me ser fram til eit godt og fruktbart samarbeid, seier rektor og styreleiar Odd Helge Mjellem Tonheim i pressemeldinga.

I ein sms til Khrono skriv han at Rangsæter er konstituert i eit halvt år.

— Høgskulen i Volda har vore ein viktig og nyskapande utdanningsinstitusjon i Noreg heilt sidan slutten av 1800-talet. Eg gler meg til å få vera med og bidra til at Høgskulen i Volda skal kunne halda fram med å vera nettopp det, seier Rangsæter i pressemeldinga.

Høgskulen i Volda

Direktøren sin sluttavtale: Tre år på heimekontor og 450.000 kroner

Har vedteke å lysa ut

I same ekstraordinære styremøte vedtok styret at stillinga som høgskuledirektør skal lysast ut. 

Styreleiar Tonheim har fått fullmakt til å sluttføra utlysingsteksten. Det er òg sett ned eit innstillingsutval, med Tonheim, styremedlem Irene Sandlie, dekan Silje Ims Lid, to representantar frå fagforeiningane og ein studentrepresentant. Dei har mynde til å leiga inn eksternt rekrutteringsbyrå etter behov, heiter det i vedtaket.