Har du lest disse?
LES VIDERE ETTER ANNONSEN
FÅ NYHETER PÅ MOBILEN
Last ned Khrono-appen!
publisering
Kvar fjerde vitskapelege publikasjon kjem frå Kina
Kina styrka sin posisjon som verdas største forskingsnasjon, målt i talet på vitskapelege publiseringar. USA taper terreng.
Publisert
Sist oppdatert
Ifølgje statistikken fossar Kina framleis fram og styrkar sin posisjon på toppen av lista av dei landa der forskarane publiserer flest vitskapelege artiklar. I 2024 stod Kina for nær 856 000 publikasjonar målt som artikkelbidrag. Det er meir enn 130 000 fleire enn året før.
Dette betyr at Kina står for 26 prosent, om lag ein fjerdedel, av alle artikkelbidrag.
Det er tal i Forskningsrådets indikatorrapport frå 2025 som viser dette. Talmaterialet er får 2024.
På same tid held talet på publikasjonar i USA fram med å falle. I perioden 2020—2024 gjekk produksjonen ned med 6,3 prosent. I Kina var veksten samstundes på over 26 prosent.
Bak Kina og USA, følgjer India, Storbritannia og Tyskland som verdas største forskingsnasjonar. Men utviklinga er ulik. Medan Storbritannia auka produksjonen med 6,4 prosent i perioden 2020-2024, gjekk Tysklands ned med 1 prosent.
Noreg tredje beste
Noreg er ifølgje statistikken til Forskingsrådet 33. verdas største forskingsnasjon målt i vitskapeleg publisering. Målt utifrå talet på artikkelbidrag per 1000 innbyggar ligg Noreg betydeleg betre an:
Med 2,8 artiklar per 1000 innbyggarar er Noreg nummer tre i verda, etter Danmark (3,1) og Sveits (3,05).
Store forskingsnasjonar som USA, Storbritannia og Tyskland har langt lågare publiseringsvolum relativt til folketalet, samanlikna med Noreg, ifølgje Indikatorrapporten.
Rapporten understrekar at desse tala ikkje nødvendigvis seier noko om produktivitetsforskjellar, fordi landa har ulike vitskapeleg spesialisering, ulike løns- og kostnadsnivå og i tillegg ulike metodar for å måle data.
Russland går ned
Medan Kina stadig rykker ifrå på statistikken, går det motsatt veg med Russland. I 2024 var Russlands andel nede i 1,6 prosent. Forskingsrådets rapport set dette i samanheng med Russlands invasjon i Ukraina, internasjonale sanksjonar og reduserte ressursar til forsking.
Både Tyskland, Storbritannia, Italia og Spania har i dag ein høgare produksjon av vitskapelege publikasjonar enn Russland, både målt i reine tal og målt per 1000 innbyggarar.
Indikatorrapporten er ein årleg rapport som blir gitt ut av Forskingsrådet. Statistikk og analysar er i hovudsak produsert av Statistisk sentralbyrå og Nifu (Nordisk institutt for studier av innovasjon, forskning og utdanning).