Nord universitet fekk hjelp av russar med falskt namn

Ein konferanse om nordområda ved Nord universitet fekk i 2021 hjelp av ein russisk mann med det NRK har funne ut var falskt. Mannen som gjekk under namnet Artem Palmetti var i realiteten Artjom Kuréjev, og skal ifølgje NRK ha arbeidd for den russiske etterretningsorganisasjonen FSB i fleire tiår.

NRK har fått tilgang til 30 sider med dokument frå ei vestleg etterretningsteneste, e-postkorrespondanse, CV, visumsøknad og lister over journalistar i Europa som er, eller har vore i kontakt med, Kuréjev og nettverket hans. 

Sanksjonert av EU

På bakgrunn av dette har NRK mellom anna funne ut at han jobba for FSB i perioden 2005-2015, og at «spesialområdet hans er å tiltrekke utenlandske eksperter, studenter og akademisere til å studere i eller skrive om Russland».

I 2023 blei han redaktør for «African Initiative», ein russisk nettstad som jobbar for russiske perspektiv i handel og partnarskap med afrikanske land. EU og Storbritannia meiner han driv med desinformasjon på vegne av russisk etterretning og sette han på sanksjonsliste i 2024. 

Han skal også ha ein dom på seg frå Estland i 2022 der det står at han har vore føringsagent for FSB sidan 2009.

Nord: Har hatt lite å si

Det var i samband med High North Dialogue Conference i 2021 og sesjonen Arctic 2050: Mapping the future of the Arctic at Kuréjev var involvert.

Nord universitet har ikkje stilt til intervju, men dekan Gry Alsos har i e-post til NRK gitt uttrykk for at ««innblandingen fra Palmetti, altså Kuréjev, har hatt lite å si for seminaret, for Nord universitet og dets ansatte».

NRK har også vore i kontakt med Kuréjev sjølv som avviser at han skal ha koplingar til russisk etterretning. 

arktis

Utan samarbeid med Russland manglar norske forskarar informasjon om halve Arktis.