Stadig fleire søkjer seg hit

Høgskulen på Vestlandet (HVL) sin marknadsdel blant førstevalssøkarar i Samordna opptak har gått opp med 0,9 prosentpoeng frå 5,55 prosent til 6,44 prosent. 

Det går fram av sakspapira til møtet i høgskulestyret 20. november. Møtet kan du sjå direkte her frå klokka 9.

Ein marknadsdel på 6,44 prosent er den største HVL har hatt sidan fusjonen i 2017. Høgskulen er den utdanningsinstitusjonen i heile landet som hadde størst auke i marknadsdel frå i fjor, heiter det under punktet rapport om studentopptak og studentrekruttering.

Nytta sosiale medium

I saksframstillinga kjem det fram at HVL totalt har hundre prosent dekning, og marknadsdelen i tal søkjarar er større enn talet på studieplassar. Men det er skilnader:

Innan helse- og sosialfag er det auka søkjartal på fysioterapi, radiologi og sosionom i tillegg til den store auken på sjukepleie. Historie, realfag, økonomi og administrasjon og teknologifag har også stor auke. Områder med låge søkjartal er estetiske fag, barnevern, ernæring, vernepleie, juss og barnehagelærarutdanning.

Styret vert orientert også om korleis høgskulen har jobba med rekruttering. I tillegg til skulebesøk har sosiale medium vorte nytta i stor grad.

Ei rekrutteringsundersøking viser at over 30 prosent av dei som aldri hadde høyrt om HVL før, fekk kjennskap til høgskulen gjennom sosiale medium.

Av andre saker på sakskartet er budsjett, utvikling av Campus Førde og studieportefølje.

Dette skal styret drøfta

Du finn saksdokumenta her.

• 51/25-B — Godkjenning av innkalling og saksliste til styremøte 7/2025
• 52/25-B — Budsjett for 2026
• 53/25-B — Rapport om studentopptak og studentrekruttering 2025
• 54/25-B — Det samla eigenfinansierte studietilbodet med opptaksrammer ved HVL for studieåret 2026/27. Nullopptak for studieåret 2026/27
• 55/25-B — Vurderingsgrunnlag for dimensjonering av studieporteføljen
• 56/25-B — Omstrukturering av Campus Førde Verftet AS
• 57/25-B — Oppdatering av Forskrift om opptak til HVL
• 58/25-B — Unntatt offentligheten iht.: Offl § 25 første ledd

• O-49/25 — Policy for forsking
• O-50/25 — Prosjekt medverknad og styring i HVL

• O-51/25 — Munnlege orienteringar frå rektor — styremøte 7/2025
• O-52/25 — Skriftlege orienteringar til styret: Nytt frå Høgskulen på Vestlandet — styremøte 7/2025
• O-53/25 — Referatsaker — styremøte 7/2025
• E-7/25 — Eventueltsaker — styremøte 7/2025