Ville studera på Sunnmøre, forfalska norskprøve

Kvinna, som kom til Noreg i vaksen alder, hadde ikkje godt nok resultat på norskprøven for vaksne innvandrarar. Ho skaffa seg difor eit falskt prøvebevis og søkte utdanning både i Ålesund og Volda.

Ho fekk ikkje godt nok resultat på prøven i norsk og samfunnskunnskap for vaksne innvandrarar til at ho fylte krava for å kunne studera ved norske universitet og høgskular.

I Møre og Romsdal tingrett forklarte kvinna, ifølgje dommen som Khrono har fått innsyn i, at ho ønska å verta sjukepleiar, og ville studera ved NTNU Ålesund.

Sidan ho ikkje hadde godt nok resultat til å kunne gjera dette, tilbaud ein venn seg å laga eit falskt prøvebevis til henne. Dette brukte ho då ho søkte opptak via Samordna opptak i april 2023.

Møre-Nytt omtalte dommen først.

Søknad vart sett på vent

Samordna opptak valde å setja søknaden hennar på vent for å undersøka vidare. Dette vart kvinna informert om, og i retten forklarte ho at ho i juli 2023 sende ein søknad om å kunne ta årsstudium i engelsk ved Høgskulen i Volda. Ho nytta det same, falske prøvesvaret.

Kvinna forklarte i retten at ho ikkje handla med forsett. Formålet hennar var berre å få nokre ekstra poeng, og ho trudde ho hadde lasta opp det originale prøvebeviset.

Retten festa ikkje lit til denne forklaringa, og meiner kvinna lasta opp det falske dokumentet med vitande og vilje.

I den delen av saka som gjeld NTNU Ålesund, erkjende kvinna straffskuld for både dokumentfalsk og flask forklaring. Punktet med falsk forklaring skuldast at ho har nytta eit falskt dokument i søknaden sin til offentleg myndigheit.

Lang liggetid hos politiet

Det var Samordna opptak som melde sakene til politiet. Det gjorde dei på slutten av 2023, og så tok det nesten eit år før kvinna vart avhøyrt. 

Den lange liggetida hos politiet får konsekvensar for straffeutmålinga, meiner retten, og sette straffa til 21 dagar på vilkår med ei prøvetid på to år. Ho må òg betala sakskostnader på 3.000 kroner.