46 millionar kroner til doktorgrads­prosjekt. Dette skal dei forske på

I ei pressemelding fredag skriv regjeringa at 23 tilsette i offentleg sektor er innvilga til saman 46 millionar kroner til doktorgradsprosjekta sine.

Dei skal mellom anna forske på korleis kunstig intelligens kan få bukt med grensekriminalitet, gjere forsvaret betre og sikre betre prioritering ved tildeling av sjukeheimsplassar

— Skal løyse konkrete problem

Forskings- og høgare utdanningsminister Oddmund Hoel (Sp) fastslår at offentlege tenester blir betre og meir effektive når dei er kunnskapsbaserte.

— Desse prosjekta vil gi forsking som skal løyse konkrete problem i offentleg sektor. Det treng vi for å utvikle løysingar som fungerer, og for at vi som samfunn kan ta forskinga raskare i bruk, seier Hoel.

Administrerande direktør i Forskingsrådet, Mari Sundli Tveit, uttalar at forskningsbasert innovasjon er avgjerande for å kunne løyse utfordringane i framtida.

— Vi treng auka forskings- og innovasjonsaktivitet i offentleg sektor og eit tettare samarbeid mellom forskingsinstitusjonane og offentlege aktørar, seier ho.

Min doktorgrad

— Livet står ikke stille selv om jeg har skrevet doktoravhandling

Politiet og Forsvaret

Blant prosjekta som får støtte er Politidirektoratet sitt prosjekt som skal gi betre kunnskap om manipulasjon av ansiktsbilete og styrke grensekontrollen.

Forsvaret får støtte til å kartlegge forskjellar i evne til stressmeistring mellom soldatar under seleksjon og erfarne soldatar i ein norsk spesialstyrke, og dessutan teste treningsmodellar for å utvikle evna til å handtere stress gjennom å la erfarne soldatar lære opp nye soldatar.

Målet er å auke prestasjonsevna til spesialoperatørar tidlegare i karrieren, skriv regjeringa i pressemeldinga.

Min doktorgrad

— Å forske er ikke for den utålmodige

Sjukeheim

Eit tredje prosjekt er Tromsø kommune sitt arbeid som rettar seg mot å forbetre prioritering og tildeling av langtidsopphald i sjukeheim.

Prosjektet vil utvikle ny kunnskap for å gi betre ressursutnytting og planlegging av helse- og omsorgstenestene i framtida.

Gjennom fokusgrupper og dokumentanalysar vil forskinga bidra til at avgjerdsprosessane blir meir transparente. Fordelinga av ressursar skal bli meir rettferdig, som til dømes behandlingstilbod og sjukeheimsplassar, og utvikle system for effektiv prioritering, står det i skildringa av prosjektet.