La ned digital grunnstein for nytt mediebygg

1.oktober fekk det nye mediebygget i Volda, som har fått namnet Sivert Aarflots hus, ein digital grunnstein.

Ifølgje Nærnett er dette den første digitale grunnsteinen til eit av Statsbygg sine prosjekt. For der ein grunnstein vanlegvis inneheld eit skrin der ein legg byggteikningar, aviser og liknand esom skal seia noko om tida bygget vart oppført, er dette for det nye mediebygget laga ein digital portal. Grunnsteinen vart difor eit klistremerke med ein QR-kode.

Frå rundkjøring til bygg

Johann Roppen, rektor ved Høgskulen i Volda, var naturleg nok nøgd etter seremonien. Han sa at bygget, som høgskulen fekk klarsignal til for vel eit år sidan, er det viktigaste enkeltprosjektet for høgskulen på mange år.

— Eg gler meg til å verta eitt med deg, Sivert Aarflot-bygget, sa dekan Kate Kartveit i si helsing.

I dei 4000 kvadratmetrane skal 500 mediestudentar og omlag 50 tilsette samlast, og det skal vera mange spesialrom. Studentane høyrer til fem ulike bachelorprogram og eitt masterprogram.

Simen Jester Langeland er masterstudent, og hadde tale på vegne av studentane. Sjølv er han ferdig med mastergrad i Volda berre månader før andre studentar kan ta i bruk det nyee bygget.

— Eg gler meg til å sjå korleis studentane inntek bygget. Og det er kjekt å sjå korleis høgskulen utviklar seg, sa Langeland, og fortalde at der nybygget no reiser seg, kunne ein tidlegare finna det han meiner må vera den minste rundkjøringa på Sunnmøre.

Håpar på pengar til innhald

Sivert Aarflot, som bygget har fått namn etter, var lensmann i Volda, og han skipa den første avisa, den første folkeboksamlinga og det første prenteverket på landsbygda i Noreg.

No skal mediestudentane flytta inn i dette bygget, og ut frå bygget som han namn etter sokneprest Hans Strøm. Men som Khrono har skrive, er det framleis ikkje sikkert om høgskulen får pengar til utstyr i nybygget. Rektor Roppen har tidlegare sagt at han håpar desse kjem med statsbudsjettet.