Leitar etter nokon som skjønar ein kompleks organisasjon

Både Universitetet i Agder (UiA) og Universitetet i Bergen (UiB) har for tida konstituerte kommunikasjonsdirektørar. Ved UiA vart kommunikasjonsdirektør Paal Pedersen utnemnd til statssekretær hos kommunal- og moderniseringsminister Nikolai Astrup i fjor vår. Ved UiB gjekk kommunikasjonsdirektør Tor Godal til Bergensavisen i fjor haust. UiB har allereie lyst ut stillinga ein gong, utan å tilsetja nokon.

Må forstå eit universitet

I Agder ønskte ein å gjennomføra ei omorganisering av administrasjonen før ein lyste ut direktørstillinga. Dette er no gjort, og tolv søkjarar har meldt seg - ein av dei er unnateken offentlegheit. På søkjarlista står mellom andre konstituert kommunikasjonsdirektør Øivind Moen Eskedal.

— Me hadde ei god søkjarliste førre gong me tilsette kommunikasjonsdirektør, og lista er interessant no, seier universitetsdirektør Seunn Smith-Tønnessen til Khrono.

Fristen for å melda interesse var 19.april, og dei første intervjua er snart i gang.

— Me ønskjer ein kandidat som forstår eit universitet, og har sett mastergrad som krav. Me ønskjer òg at den som vert tilsett har røynsle frå eit redaksjonelt miljø, seier Smith-Tønnessen.

— Vil de ha ein kandidat som kjenner akademia?

— Det er ikkje ein naudynt kvalifikasjon, men noko som er ønskjeleg.

16 søkjarar i Bergen

I fjor haust stod det 25 namn på søkjarlista då UiB lyste ut direktørstillinga, fleire av dei med kjennskap til UiB. Men ingen vart tilsett.

— Me fann ingen med den profilen me ønska for stillinga, sa assisterande universitetsdirektør Tore Tungodden til Khrono i november.

Då hadde UiB-leiinga gjennomført nokre intervju.

Også tidlegare har UiB valt å ikkje tilsetja kommunikasjonsdirektør etter utlysing.

No har det meldt seg 16 søkjarar, blant dei konstituert kommunikasjonsdirektør Olaf Erland Gundersen. To søkjarar har trekt seg.

— Spanande stillingar som krev rett person, seier universitetsdirektør ved UiB, Robert Rastad, til Khrono.

— Me får gode søkjarar. Godal, som gjekk til BA, gjorde ein kjempegod jobb. Også i fjor haust var det gode søkjarar, men då var me i ein fase der eg skulle byrja i stillinga ved UiB, og me valde difor å utsetja prosessen til no.

Rastad seier det er tre eigenskapar som trengs for å kunne leia kommunikasjonsarbeidet ved ein stor, kompleks organsiasjon som eit universitet:

— Ein må vera god på det kommunikasjonsfaglege, ein må ha forståing av ei kompleks verksemd, der formidling er ei viktig oppgåve, og ein må vera ein god leiar.

— Er det lettast å læra ein kandidat sektoren eller kommunikasjonsfaget?

— Eg begynte sjølv som kommunikasjonsdirektør i Bergen kommune utan å kunne kommunal sektor, seier Rastad.

UiB hadde søknadsfrist 11.april, og det er no sett ned ein komité som tek seg av gjennomgang av søknadane og innkalling til intervju.

Fleire med kommunikasjonsbakgrunn

På begge søkjarlistene finn ein personar som har kommunikajsonsfagleg bakgrunn. Anne Kirkhusmo har søkt begge stillingane. Ho står no som sjølvstendig næringsdrivande, og har tidlegare mellom anna vore kommunikasjonssjef i Kirkens nødhjelp. Ved UiA har Stian Rønvåg søkt. Han er kommunikasjonsrådgivar i PR-operatørene. Randi Røinaas Lomeland jobbar med kommunikasjon hos straumleverandøren LOS.

Ved UiB har kommunikasjonsdirektørane Jean-Yves Gallardo frå Unicef og Maria Schütz Fløisand frå Salmon Group søkt. Det same har Per Arne Hvidsten Larsen. Han er politisk rådgivar for finans- og næringsbyråd Erlend Horn (V).

(LES VIDERE ETTER AnnonseN)

Last ned Khrono-appen og få varsel om de viktigste nyhetene.
Last ned til iPhone - Last ned til Android
-