Sverige har fem. Noreg har null blant dei hundre beste 

Lunds er heilt på toppen av lista blant 2.000 rangerte universitet i 200 land.

QS World University Rankings er ei av dei største rangeringane og har no kome med ei liste over det dei reknar som dei flinkaste til å sørge for berekrafta.

Sverige har heile fem universitet blant dei 100 beste. Uppsala universitet er på 32. plass og Universitet i Göteborg nummer 50. Fleire andre nordiske universitet hevdar seg relativt høgt på lista:

Aalto-universitetet i Finland er det 61. mest berekraftige i verda, ifølgje rangeringa. Syddansk Universitet er nummer 107. Det nest beste danske er Aalborg Universitet på 148. plass.

176. plass

NTNU er det norske universitetet som kjem best ut av QS-rangeringa med ein 176. plass. Dernest følgjer Universitetet i Oslo som nummer 377 og Universitetet i Bergen, som blir rekna som det 506. beste i verda når det gjeld berekraft.

QS berekraft-rangering måler både miljømessig og sosial berekraft. I miljødelen går miljømessig berekraft og kvaliteten på undervisning og forsking inn. Sosial berekraft handlar mellom anna om kor godt ein får til skape utjamning og likeverd (equality), kor god ein er med kunnskapsutveksling og å legge til rette for helse og velferd.

I tillegg til miljø og den sosiale dimensjonen tar analysen omsyn til faktorar som etikk, tilsettingspraksis og transparens i styringa av universitetet.

Lunds universitet har full pott, 100 av 100 poeng, både på miljø og styring — og knappe 98 når det gjeld sosial påverknad.

 Topp og botn

NTNU scorar 99,5 poeng av 100 moglege på miljøforsking — og også høgt på si eiga miljømessige berekraft med 57,2 poeng. Noregs miljø- og biovitskapelege universitet (NMBU) får til samanlikning 31 poeng på denne indikatoren, og kjem heller ikkje like høgt på miljøforskinga (83,5 poeng).

Universitetet i Søraust-Noreg — som er det lågast rangerte universitetet av dei norske, og plassert i kategorien blant dei 1500—2000 beste — har 1 poeng av 100 moglege for kvaliteten på sitt eige berekraftsarbeid.

I toppen av rangeringa etter Lunds universitet følgjer University of Toronto, Canada, og dernest britiske University College London. Blant dei ti beste i verda er fem frå Storbritannia, tre frå Canada og eitt frå Australia.