Vil legga ned to bachelor­program og oppretta to nye

Styret ved Høgskulen på Vestlandet (HVL) har todagars møte denne veka. Onsdag møtte styret mellom anna studenttinget og fekk ei orientering om Kronstad-torget, som skal inn i lokalet der bokhandelen på høgskulen tidlegare var. I tillegg hadde styret ein lukka seminardel. 

Torsdag skal styret drøfta ordinære styresaker. Du kan følgja strøyming frå klokka 9 via denne lenka.

Vil legga ned to i Sogndal

Ei av sakene som skal drøftast, er om høgskulen skal legga ned to bachelorprogram. Det er bachelor i natur- og opplevingsbasert reiseliv i Sogndal og bachelor i energiomstilling, også det i Sogndal. Det førstnemnde studiet har ikkje tatt opp studentar sidan studieåret 2023/24, og det er forventa få konsekvensar av ei nedlegging, heiter det i saksframstillinga.

For bachelor i energiomstilling er det konsekvensar. Det var ikkje opptak til studiet i år, men det vart teke opp studentar i fjor. I saksframstillinga heiter det at det vil vera arbeidsoppgåver knytt til programmet i 2025/26, men i 2026/27 vil enkelte tilsette ha auka behov for nye oppgåver. Fagseksjonar og instituttet er i gang med eit arbeid med langsiktige planar for undervisning og FoU-aktivitet, for å avklara dette, heiter det.

Begge bachelorprogramma ligg under Fakultet for teknologi, miljø- og samfunnsvitskap, og rektor støttar fakultetet sine vurderingar.

OPPMØTE

487 flere møtte opp på lærer­utdanningene i år

Vil ha yrkesfaglærarutdanning

På den andre sida ønskjer Fakultet for lærarutdanning, kultur og idrett å greia ut to nye bachelorprogram. Det eine er bachelor i yrkesfaglærarutdanning.

I saksframstillinga vert det peika på at søkjartala til yrkesfag i vidaregåande skule er høge. Utdanninga er tenkt som samlingsbasert, og skal leggast både til Bergen, Sogndal og Stord. Det vert understreka at fylkeskommunen er svært interessert i at HVL får i gang eit slikt tilbod.

Den andre bachelorgrada styret skal ta stilling til om ein skal jobba for å få i gang, er bachelor i tolking og omsetjing. I saksframstillinga heiter det at HVL i dag tilbyr tre grunnemne innan tolking i offentleg sektor. Fakultetet ønskjer no å oppretta eit bachelorstudium innan same område, som ei fellesgrad saman med Universitetet i Agder (UiA). Bachelorgraden skal førebu kandidatane til å møte den aukande etterspurnaden etter kvalifiserte tolkar og omsetjarar i offentleg sektor. 

Planen er at studentane skal ta 150 studiepoeng ved HVL og 30 ved Universitetet i Agder, og studieplanen er eit deltidsstudium over fire år.

— Dersom det viser seg at ei fellesgrad med UiA ikkje er gjennomførbar, verken praktisk eller økonomisk, vil fakultetet halda fram med utgreiing av eit sjølvstendig HVL-program innan tolking og omsetjing, heiter det i sakspapira.

I tillegg til desse to ønskjer også HVL å oppretta ein eigen entreprenørskapsskule. Den skal organiserast som eit toårig masterprogram med tjue studentar på campus Bergen.

Heile sakslista for styremøtet finn du her.