Kunstig intelligens
Fryktar robotjuks — går tilbake til penn og papir
Fleire universitet i Australia er ferd med å innføre nye reglar for å hindre studentar å ta i bruk samtalerobotar og kunstig intelligens til eksamen.
![Spørsmålet om korleis ny teknologi basert på kunstig intelligens er raskt blitt svært aktuelt ved universitet og skular over heile verda. Bildet er frå Universitetet i Sydney.](https://image.khrono.no/749675.webp?imageId=749675&x=0.00&y=0.00&cropw=100.00&croph=76.22&width=968&height=554&format=jpg)
Den mykje omtalte samtaleroboten ChatGPT, som er basert på kunstig intelligens (KI), er blitt spådd å snu opp ned på delar av forskings- og undervisingskvardagen. No tar fleire leiande australske universitet grep for å hindre eksamensjuks, skriv den britiske avisa The Guardian.
Blant universiteta som har innført nye reglar, er Universitetet i Sydney. Der heiter det no at å «generere innhald med bruk av kunstig intelligens» er ei form for juks.
Ei samanslutning av åtte av dei leiande forskingsuniversiteta i Australia har uttalt at dei har endra vurderingskriteria som følgje av den nye teknologien.
Ved Universitetet i New South Wales har undervisarar hatt «krisemøte» om korleis ein skal rette eksamen i år, og om regelverket er oppdatert med tanke på faren for plagiat, ifølgje The Guardian. Det er så langt berre oppdaga mindre alvorlege tilfelle av juks ved universitetet.
— Endrar radikalt
ChatGPT, som vart lansert i fjor haust av det amerikanske selskapet Open AI, er langt meir avansert enn tidlegare liknande verktøy. ChatGPT er allereie i stand til å skrive avhandlingar, dikt og løyse avanserte matematiske oppgåver i høgt tempo.
I Noreg har både Universitetet i Stavanger og Agder meldt at dei har avdekt bruk av ChatGPT i samband med eksamen.
Ein av dei som har varsla ein revolusjon i kjølvatnet av teknologien, er professor i medieinnovasjon, Peter Bae Brandtzæg.
— Det kjem til å radikalt endre måten vi skriv på, akkurat slik fotografiet gjorde, sa han i eit intervju med Khrono i desember i fjor.
Etter at Universitetet i Agder avdekte bruk av ChatGPT til eksamen, har institusjonen hatt seminar for tilsette om korleis ein bør stille seg til samtaleroboten. Universitet har så langt ikkje endra på regelverket.
— For tidleg
Det har heller ikkje andre forskings- og utdanningsinstitusjonar i Noreg gjort, så langt Khrono kjenner til.
— Det er for tidleg å seie korleis vi skal forhalde oss til dette, fordi vi ikkje har testa det opp mot reglane for fusk, uttalte prorektor for utdanning ved Universitetet i Stavanger, Astrid Birgitte Eggen.
Også i skulane er diskusjonen om bruk av samtalerobotar og kunstig intelligens venta å skyte fart. Førre veke melde amerikanske media at alle offentlege skular i New York forbyr bruk av ChatbotGPT.
Nyeste artikler
Han er en av åtte menn på studiet. 70 er kvinner
Anne Borg blir styremedlem i EU-institutt for innovasjon
Kjempet for å få tilbake vitnemålet — nå har han tapt i to rettsinstanser
Sommerlektyre for genier
Kritisk mangel på studentboliger i Norge
Mest lest
Etter at han ble pensjonist, har han tatt fire mastergrader
Vedtok endring av rasistiske plantenamn. — Eg er glad, stolt og letta
Kan Kaptein Morf lære barn om de minste delene av språket?
« … det handler ikke bare om å utdanne en elite …»
Forskere sperrer innsjekk på Gardermoen