Kraftige reaksjonar på manglande auke i studiestøtte

— Me er skuffa. Me høyrer om studentar som hoppar over måltid for å få det til å gå rundt økonomisk.

Det sa Maud Alfstad Bjørgum, president i Ansa, til Khrono i Vandrehallen på Stortinget etter at finansminister Jens Stoltenberg hadde presentert regjeringa sitt forslag til statsbudsjett onsdag morgon. 

I forslaget ligg det ikkje å knyta studiestøtta til grunnbeløpet i folketrygda, slik mange hadde håpa på førehand. 

I vår vedtok Stortinget nemleg at regjeringa skal fremja forslag om å knyta studiestøtta til grunnbeløpet i folketrygda. Men det skal skje i komande stortingsperiode, ikkje nødvendigvis i budsjettet for 2026. 

I forslaget frå regjeringa som vart lagt fram onsdag, ligg det inne ein auke på 2,1 prosent i studiestøtta, som er om lag 32o kroner i månaden.

Sjå Khronos sending frå Stortinget på statsbudsjett-dagen her:

Vil ha minst 1,5 G

— Etter eit så tydeleg politisk signal frå Stortinget hadde me forventa at regjeringa leverte, skriv Sofie Strøm Olsen i Nito-studentane i ein e-post.

— Me hadde forventa at studiestøtta vart knytt til folketrygda. Studiestøtta burde allereie vore på 1,5 G, med ein plan for opptrapping til to G i løpet av dei neste fem åra, sa Ingrid Marie Aarre i Organisasjon for Norske Fagskolestudenter til Khrono i Vandrehallen.

Nito-studentane set no sin lit til SV.

– Dei gjorde ein fantastisk innsats for å løfta studiestøtta i førre regjeringsperiode, og me håpar dei vil halda fram med å prioritera oss no.

statsbudsjettet 2026

Regjeringen satser tungt på teknologi. Nullvekst for universiteter og høgskoler

Vil at studentar skal få vera studentar

Måndag varsla regjeringa at det skal setjast ned eit offentleg utval som skal sjå på ordningane for studiestøtte.

— Det er bra, men det må ikkje verta ei sovepute, sier Lise Randeberg i Akademikerne. 

Ho understrekar at det er viktig at ein har høve til å både studera og å reisa på utveksling uavhengig av kven foreldra dine er. Ho er òg oppteken av at studentar skal kunne vera studentar.

— Dei skal ikkje måtte bruka mesteparten av tida på å jobba, seier Randeberg.

Også Steinar Sæther i Forskerforbundet er oppteken av at studentar skal kunne vera nettopp det.

— Når studentane må jobba meir og meir i tillegg til å studera, har det noko å seia for kvaliteten på studia, sa han til Khrono i Vandrehallen.

Sjå Khronos samleside om statsbudsjettet her.

— Slag i trynet

Sigve Næss Røtvold i Norsk studentorganisasjon (NSO) var tidlegare i veka nøgd med at studiefinansieringa skal under lupa. Men han var ikkje spesielt nøgd etter at Arbeiderpartiet sitt forslag til statsbudsjett var presentert.

— Me hadde større forventingar til Arbeiderpartiet og til regjeringa som i valkampen lova å prioritera studentane, sa han.

Også politikarar var skuffa over Arbeiderpartiet.

— Første slag i trynet er at studentane får realnedgang i studiestøtta, kjem det frå Sunniva Eidsvoll Holmås i SV.

— Studentane går store summar i minus kvar månad. Utan rike foreldre eller oppsparte midlar, så må ein jobba veldig mykje for å koma seg gjennom studiane.

Siren Jensen frå MDG er heller ikkje imponert over budsjettforslaget.

— Statsbudsjettet er ei krise for studentøkonomien, skriv ho i ein e-post til Khrono. 

— MDG hadde håpa at det endeleg skulle vera studentane sin tur, med ei støtte det går an å leva av.

statsbudsjettet 2026

Regjeringa dropper sletting av studiegjeld i 101 kommuner