Får hundre millionar kroner for å bygge musikalsk allianse

Noregs musikkhøgskole kan saman med sju andre søsterinstitusjonar gå sommaren i møte med friske millionar i kassa frå EU-kommisjonen og Erasmus +. Til saman skal dei fordele ei løyving på 8,64 millionar euro mellom seg over fire år.

Pengane skal brukast til å etablere ein såkalla EUA — European Universities Alliance.

Oslo, Beograd, Barcelona

Alliansen, som har fått namnet IN. TUNE, skal mellom anna ruste musikkutdanningane og studentane som går ut derifrå til å møte rask teknologisk utvikling og endringar i rammevilkåra for kunstnarar, heiter det i ei pressemelding frå Musikkhøgskolen.

— Eg er veldig glad for tildelinga. Dette er ei veldig god nyheit for oss å få. Ikkje minst fordi det har vore eit tøft år internt, og at vi har måtta kutte og lage spareplanar som følgje av reduserte løyvingar på statsbudsjettet, seier rektor ved Musikkhøgskolen, Astrid Kvalbein, til Khrono.

Ho peikar på at det er store skilnader mellom utdanningsinstitusjonane som går inn i alliansen, og at dette gir eit stort potensial for å lære og dele. I tillegg til Oslo er institusjonar frå mellom andre Paris, Helsinki, Wien, Beograd og Barcelona med i samarbeidet.

Nest siste runde

— Vi har hatt eit senter for framifrå undervisning i ti år. Frå vår side er det fint at vi gjennom alliansen kan få vidareføre noko av det dette senteret har tilført, seier Kvalbein.

Dei europeiske universitetsalliansane, som er knytt til European Universities Initiative, har som føremål å bygge nettverk mellom utdanningsinstitusjonar i Europa. Målet er å styrke utveksling av kunnskap og stimulere til felles program og studieplanar. 

Det finst så langt 50 alliansar. Med neste og førebels siste søknadsrunde neste år er talet venta å kome opp i 60 alliansar.