Nøttesteik — på godt og vondt

Adventsprat

Roman Linneberg Eliassen

• Roman Linneberg Eliassen er redaktør for sakprosa­tidsskriftet Prosa. 
• Han utdanna samfunnsøkonom frå  Universitetet i Bergen (2012) med ph.d. (On the liberty of thought and discussion in economics) frå Anglia Ruskin University). 
• Han er sakprosaforfattar og har skrive og omsett fleire bøker om økonomi og pengar.

Khrono har intervjua eit knippe interessante personar i akademia på e-post om året som snart er over og om året som kjem. 

Intervjua kan du lesa fram mot jul.

Roman Linneberg Eliassen er bergensar og redaktør for Prosa, eit tidsskrift for sakprosa, utgjeve av Norsk faglitterær forfatter- og oversetterforening (NFFO). Han har skrive og omsett eit par bøker om økonomi, og no jobbar han med tekstar om norske og omsette bøker, alt frå kokebøker til tunge akademiske verk.

— Kva er det beste og det verste som har skjedd deg i jobbsamanheng i 2024?

— Eg vart kanskje uforholdsmessig glad då Dag Rune Olsen, rektor ved UiT, skreiv ein refleksjon om akademisk fridom i Khrono etter å ha lese om Wilhelm von Humboldt og omsetjinga av hans klassiske tekst i Prosa (både innleiing og omsetjing var av Regine Rørstad Torbjørnsen). Det verste vil eg ikkje tenkje på.

— Kva er det beste og verste som kan skje i 2025?

— Det beste kan eg ikkje førestilla meg, men det hadde vore bra om Dag Rune Olsen sende inn eit bidrag til Prosa. Men eg må kanskje refusera det, sidan det sikkert ikkje vil passa med dei temaa me har på blokka. Det verste torer eg ikkje tenkje på. 

— Korleis pregar den økonomiske situasjonen i sektoren arbeidskvardagen din? 

— På indirekte vis. Den økonomiske situasjonen i sektoren påverkar moglegheita til djuptgripande kunnskapsformidling, både gjennom pensumbøker og populærvitenskapelege bøker. I Prosa driv me med formidling av og debatt om fagkunnskap i offentlegheita. Kunnskapen må ut til folket - og då trengst både tid og pengar.

— Kven i akademia fortener ei julestjerne?

— Studenten frå «sjølvplagiat»-saka, for tort og svie, og regjeringa bør betala og trappa opp på døra med julestjerne, nakne, i vinterkulda.

— Om du kunne valt heilt fritt, kven vil du ha som den neste statsråden for forsking og høgare utdanning? 

— Ein redaktør hadde vore noko, og då må det bli Tove Lie. Men han er ikkje so galen han som er no. Hoel treng berre litt meir pengar, og å kle på seg att etter å ha levert julestjerna til studenten. Generelt treng me nokon som skjønar klassisk danning, utan at dei er heilt Bernt Hagtvet.

Fire kjappe:

— Fullfør setninga: Om eg var rektor for ein dag ville eg … 
— … sett i verk drakoniske tiltak for å redusera karbonavtrykket til institusjonen.

— Kva står på julemenyen?
— Nøttesteik 

— Kva gler du deg minst til med jula?
— Nøttesteik 

— Kva MÅ vera på plass for at det skal bli ekte jul?
— Nøttesteik