Vidareutdanning: Svindlarjakt

Det siste året har det vore fleire medieoppslag om økonomisk svindel på Helgeland. Men no skal Nord universitet saman med mellom andre Sparebank1 Helgeland og IT-selskapet Tietoevry tilby etter- og vidareutdanning innan korleis ein kan sikra seg mot finansiell kriminalitet. Eller, sagt på ein annan måte, korleis ein kan motverka digital svindel.

— Behovet for oppdatert kunnskap innan område som cybertryggleik, førebygging av svindel og å sikra betalingssenter er stort, seier Krister Salamonsen på Nord universitet sine eigne nettsider.

Han er førsteamanuensis ved Handelshøgskolen ved Nord universitet og prosjektleiar for denne etter- og vidareutdanninga.

datasikkerhet

Opplever at fremmede stater prøver å ta seg inn

Fleire treng kompetansen

Salamonsen seier at store næringsaktørar har meldt til Nord universitet at dei har behov for kunnskap om korleis ein kan kjempa mot digital, finansiell kriminalitet.

— Dei som sit på denne kompetansen til no, er små miljø i eit lite utval verksemder. Med tanke på kor breitt og altomfattande dette er, ser me at fleire organisasjonar treng å få denne kompetansen, seier Salamonsen til NRK.

Han seier til Khrono at både trendar over tid og korleis ein kan førebygga digital, finansiell kriminalitet vil vera tema på kursa.

— Det er eit kappløp, og det handlar om å forstå fenomenet digital svindel, og om at tilsette både i offentlege etatar, i bankar og revisorar skal kunne oppfatta når eller viss det skjer merkelege ting, seier Salamonsen.

Nord universitet fekk 2,25 millionar kroner frå HK-dir i vår, som ein del av bransjeprogrammet for finansnæringa. Målgruppe for vidareutdanninga er tilsette i bank og finans, og utdanninga vil vera samlingsbasert med fysiske samlingar i Mo i Rana. 

Planen er at ein frå neste haust skal tilby såkalla mikroemne, som til saman vil gi 7,5 studiepoeng. Eitt av emna er digitale skift i svindeltrendar og proaktiv førebygging av svindel.

— Eg er prosjektleiar, men eg berre ein enkel siviløkonom, eg, seier Salamonsen og humrar.

— Men me kjem til å henta inn dei beste i landet til å førelesa. Etter- og vidareutdanningskurs er ganske enkle å etablera, men på sikt håpar me òg å kunne få desse temaa inn i bachelorgrada vår.

TikTok

OsloMet anbefaler studenter å slette TikTok

Frå gata til det digitale

Administrerande direktør i Sparebank1 Helgeland, Hanne Nordgaard, seier til NRK at dei kriminelle har flytta inn frå gata og inn i den digitale verda. Ifølgje Finans Norge vart nordmenn svindla for ein milliard kroner i fjor, og bankdirektøren er glad for at Nord universitet no startar denne utdanninga.

— Det løner seg mykje meir for dei kriminelle å sitja på store call-senter med digital kriminalitet enn å gå ut i gata og montera utstyr på minibankar. Det er digitalt det no er lettast for dei kriminelle å få tak i pengane, seier Nordgaard.

Oppdatert 22.8 kl 13.34 med kommentarar frå Krister Salamonsen