Universitetet i Bergen

Vil ikkje svare på spørsmål om professoropprykk. «Går gjennom rutinene»

Dekan Gunn Mangerud beklagar at ting har tatt tid, og lovar å gå gjennom rutinar for saksbehandling. Ho vil ikkje svare på spørsmål om gransking.

Gunn Mangerud, dekan NT-fakultetet, Universitetet i Bergen, vil ikkje uttale seg om det ho kallar ei personalsak.

Foto: Eivind Senneset

Tekst: Njord V. Svendsen njord.svendsen@khrono.no

Publisert 17.06.2025 - 15:12

Etter eit halvt år lang saksbehandling som er blitt karakterisert som ein «kafkaprosess», og som har ført til varslingssak, kom konklusjonen måndag ettermiddag:

Førsteamanuensis ved Institutt for fysikk og teknologi, Dorte Nørgaard Madsen, får opprykk til professor.

Kva fekk arbeidsgivaren til å snu så brått?

Det vil dekan ved Fakultet for naturvitskap og teknologi (NT-fakultetet) ved Universitetet i Bergen (UiB), Gunn Mangerud, ikkje svare på.

Universitetet i Bergen

Fakultetet bremsa opprykk i eit halvt år. No blir Dorte Madsen likevel professor

Vil ha gransking

Khrono har stilt fleire spørsmål til dekanen, blant anna om korleis ho stiller seg til ønsket frå Forskerforbundet om ei gransking av saka.

FAKTA

Opprykkssaka ved UiB

Forskerforbundet varsla i mai leiinga ved Universitetet i Bergen om «Kritikkverdige forhold ved NT-fakultetet».
Bakgrunnen var førsteamanuensis Dorte Nørgaard Madsens søknad om opprykk til professor. Ein nasjonal komite anbefalte opprykket i desember 2024. Fakultetet gjennomførte ikkje opprykket, men etablert to eigne komitear.
Forskerforbundet meiner fakultetets saksbehandling er strid med lover og forskrifter og ber preg av «nidkjær leting etter feil og mangler i Madsens søknad» og «en negativ særbehandling uten sidestykke i noen opprykkssaker».
Madsen stod sjølv stått fram i Khrono og fortalde om si oppleving av saka og ein svært utfordrande arbeidsmiljøsituasjon.
Fakultetet har beklaga at saksbehandlinga har tatt tid, og gjort det klart at dei framleis støttar den nasjonale opprykksordninga for behandling av søknader til professoropprykk, men utover det ikkje kommentert saka.

Leiar i Forskerforbundet ved UiB, Steinar Vagstad uttalte til Khrono måndag at «denne saka er ikkje ferdig», og at «ei ekstern gransking ville vere naturleg å vurdere». Han har tidlegare karakterisert saka som ei av dei verste han har vore borti.

I mai leverte Forskerforbundet varsel om saka til UiB-leiinga.

Opprykkssaka har vekt reaksjonar hos fleire. Professor ved UiB, Gisle Selnes, har også lagt fram ønsket om at saka får ei uavhengig gransking.

Beklagar tidsbruk

Då Khrono først fortalde historia, retta Dorte Madsen ein appell til UiB-leiinga om å kome til botnen i saka.

— Universitetet skal vere rollemodell for resten av samfunnet. Eg håper dei vil seie, «slik skal det ikkje vere, slik kan vi ikkje ha det», sa ho.

Rektor ved UiB, Margareth Hagen, seier til Khrono at ho no vil invitere Forskerforbundet til eit møte. Utover det ønsker ho ikkje å kommentere saka.

NT-fakultetet nedsette så seint som 12. mai ein tredje komité som, ifølge oppdraget, skulle «vurdere Dorte N. Madsen sin søknad om kompetanseopprykk til professor (...)».

Då hadde ein såkalla supplerande komité kome fram til same konklusjon som den nasjonale komiteen, som eigentleg har oppgåva med å vurdere professorsøknader: At Madsen var kvalifisert for opprykk.

Går gjennom rutinar

Mangerud har sendt ein e-post som svar til Khrono:

«Først vil jeg igjen beklage tiden det har tatt å behandle dette opprykket. Vi går nå igjennom rutinene for saksbehandling for å påse at det ikke skjer igjen. Videre vil jeg på generelt grunnlag understreke at vi støtter fullt opp om den nasjonale opprykksordningen og vil jobbe for å styrke denne videre sammen med de andre institusjonene som har sluttet seg til den nasjonale opprykksordningen. Utover dette har jeg ingen kommentar til denne personalsaken».

Khrono har spurt om kva vurderingar som førte til at fakultetet brått avgjorde saka, og kva som konkret ligg i å «gå gjennom rutinene for saksbehandling, — men ikkje fått svar.