No kjem det pengar til nytt museum i Tromsø

— No er prosjektet modent, seier statsminister Jonas Gahr Støre (Ap) i ei pressemelding frå UiT Noregs arktiske universitet (UiT).

Då Støre var i Tromsø før helga, hadde han med seg 65 millionar oppstartskroner til nytt universitetsmuseum. Det betyr at ei lang soge kan få ein ende, og museet kan stå ferdig om sju år.

— Eit nytt universitetsmuseum er viktig for universitetet, og byen Tromsø, seier Støre.

Rektor Dag Rune Olsen er også nøgd.

— Dette er ein veldig god dag for alle i Noreg, men kanskje særleg for oss som bur i Nord-Noreg, for me skal skapa ein spanande stad med nye opplevingar og ny kunnskap om nordområda, seier han.

statsbudsjett

Dei ønskjer seg nye bygg. Kan dei håpa på ei førjulsgåve?

Lang dags ferd mot museum

I 2016 var bestillinga frå staten eit museum med ei kostnadsramme på 1,5 milliardar kroner. Men prisen steig, og i 2022 sa dåverande forskings- og høgare utdanningsminister Ola Borten Moe at prisen måtte ned.

Borten Moe gjekk av, og den neste statsråden, Sandra Borch, reiste til Tromsø saman med statsministeren for å fortelja at museumsprosjektet måtte kuttast om lag til det halve.

Så gjekk Borch av, og i januar 2025 kunne Oddmund Hoel fortelja at det nye universitetsmuseet skal få heilt nye lokale i Tromsø sentrum. Men Hoel rakk ikkje å dela ut pengar før han også gjekk av.

Ferdig i 2032

Dei 65 millionane Støre no, saman med næringsminister Cecilie Myrseth, hadde med seg, skal brukast på eit obligatorisk forprosjekt som alle statlege byggeprosjekt må ha. Dette er planlagt å vera ferdig i 2026, og Statsbygg og UiT sin plan er då at museet er klart til å opna i 2032.

— Tromsø er et nav i nord når det gjeld kunnskap, og opprettinga av universitetet i Tromsø er eit av dei viktigaste nordområdetiltaka me har gjort, seier Myrseth.

— Med å få på plass eit museumsbygg satsar me på kunnskap og me satsar på nord.

universitetsmuseet

Møtt av demonstrantar på opning av museum