Visumkontoret er bomba. No kjem ikkje professoren seg til Noreg

Han har vore i Noreg fleire gonger før, som ledd i samarbeidet med Universitetet i Søraust-Noreg (USN). Med Erasmus-stipend i lomma var planen å komme igjen på eit tre månader langt opphald som gjesteforskar.

Men då må Nazmi Al-Masri ha visum — og det er ein komplisert affære når du bur i Gaza.

For å kunne søke om visum må han møte opp og ta fingeravtrykk (biometri). Problemet er at lokala der det norske utanriksdepartementet har utført dette i Gaza er bomba og øydelagt. 

Nazmi Al-Masri arbeider ved Det islamske universitetet i Gaza.

Må over grense

Beskjeden Al-Masri og USN har fått frå Utlendingsdirektoratet (UDI), som tar hand om visumprosessen, er at han må til den norske ambassaden i Amman eller Kairo for å gjennomføre biometrien. Utan denne får han ikkje søke visum.

— Vi har hatt fleire samtalar med UDI i håp om å finne ei løysing. Beskjeden er at slik er reglane. Men det er svært vanskeleg å komme seg ut av Gaza, og kjem du deg over grensa og ut, er faren for å ikkje sleppe inn igjen overhengande, seier Anders Davidsen, universitetslektor ved USN som er Al-Masris kontakt og samarbeidspartnar.

Davidsen oppfattar norske styresmakter som unødvendig byråkratiske og lite villige til å finne løysingar.

Khrono har tidlegare fortalt om Khamis Elessi, palestinsk lege og professor i medisin, som fekk stipend og ei stilling ved Universitetet i Oslo (UiO) gjennom Scholars at Risk-programmet. 

Ved UiO jobba kollega Espen Bjertness for få Elessi ut av Gaza og til Noreg. Det lukkast til slutt, etter to år. 12. februar landa Elessi på Gardermoen.

Palestina

Ute av Gaza etter to år. Nå venter stillingen ved UiO

Kollega drepen

— I realiteten blir Al-Masri nekta visum, seier Davidsen.

I Ramallah har norsk UD representasjonskontor, men Israel har stengt grensa dit for Gaza-palestinarar.

USN har lenge hatt samarbeid med palestinske kollegaer gjennom Norpart Palestina-prosjektet («Developing Pedagogy for Early Childhood Education in Palestine and Norway») som er finansiert av HK-dir.

I oktober 2023 vart dekan for lærarutdanninga ved Det islamske universitetet, Ibrahim Al-Astal, drepen i eit bombeangrep. Al-Astal var også på fleire opphald i Noreg og nær kollega av Al-Masri.

Midtøsten

USN-ansatte i sorg etter bombing i Gaza. — Så drøyt, så drøyt

UDI: Ingen alternativ

UDI stadfestar til Khrono at søknadssenteret i Gaza er øydelagt og ikkje lenger operativt. 

«Personar fra Gaza som vil søke om visum til Norge, må derfor levere dokumentene ved et annet søknadssenter, for eksempel i Amman eller Kairo», skriv UDI i e-post.

På spørsmål om det kan finnast andre løysingar for Al-Masri, sidan det er for risikabelt for han å reise ut av Gaza, svarer UDI: 

«Vi har forståelse for at dette er vanskelig, men UDI har ikke mulighet til å tilrettelegge for alternative måter å søke på.»

Scholars at risk

Fra Gaza til Gardermoen: — So good to see you, my dear brother!