UiT-forskar blir hovudtrenar i fotballklubben Benfica

«Stjernesignering!», slår UiT fast på sine Facebook-sider.

I tillegg til å ha vore stipendiat ved universitetet, er Ivan Baptista forskar ved Female Fotball Research Centre ved UiT.

Det er kvinnelaget til Benfica som Baptista no skal prøve å føre til nye triumfar. Lisboa-klubben er ein av dei store i Europa.

Kvinnelaget er mestvinnande i heimlandet og regjerande meistrar. Laget gjekk gjennom heile fjorårssesongen utan eit einaste tap. Benfica kom også til kvartfinalen i årets Champions League.

Kunnskap og fotball

— Vi er stolte over at ein av våre forskarar med doktorgrad i fotball frå UiT er tilsett som hovudtrenar i ein stor klubb som Benfica, seier professor Svein Arne Pettersen, som er leiar for forskargruppa.

Han meiner tilsettinga viser at kunnskap no veg tyngre enn før for å kunne få jobbar som trenar på høgt nivå.

I doktorgraden sin undersøkte Baptista det fysiske arbeidet som blir utført i fotballkampar i ulike spelarposisjonar. Han jobba også tett med A-laget til TIL medan han var i Tromsø.

— Det er med stor entusiasme eg kjem til denne klubben, til eit prosjekt av slike dimensjonar, seier Baptista på Benficas heimesider, i samband med at han vart presentert som trenar tidlegare denne veka.

Benfica meiner dei får ein trenar med «omfattande akademisk erfaring, særleg innan trening og fysisk førebuing, som er nøkkel­element i kvinnefotballen».

Frå Benfica til OsloMet

I 2012/13-sesongen vann Baptista den portugisiske cupen med Boavistas kvinnelag. Då var han den yngste portugisiske trenaren som hadde vunne denne pokalen. 

Dei siste månadene har 33-åringen også vore fysisk trenar på deltid i Molde fotballklubb. 

Ivan Baptista blir ikkje den første akademikaren frå eit norsk universitet med band til Benfica. Ved OsloMet held folkerettsjurist og statsvitar Nuno Marques til. På 1990-talet var han spelar på Benficas herrelag, før han flytta til Noreg.

Marques er også politikar, og blei intervjua av Khrono i samband med valet i 2023.