Debatt ● Gunnar Yttri og Mattis Munkvold Rovik
Den beste studiestarten
Unge menneske som satsar på høgare utdanning fyller ei uroleg tid med håp.
Publisert
Denne teksten er et debattinnlegg. Innholdet i teksten uttrykker forfatterens egen mening.
Måndag 11. august 2025: Endeleg studiestart ved høgskular og universitet! Høgskulen på Vestlandet (HVL) helsar 4000 nye studentar hjarteleg velkomne til moderne og nystrigla campus i Bergen, Førde, Haugesund, Sogndal og på Stord. Her ventar eit fagleg fellesskap med over 16000 studentar og 1900 tilsette.
Våre studentar satsar på utdanning ved ein høgskule som tilbyr eit spekter av profesjons- og arbeidslivsretta utdanningar. Døme er ingeniørutdanning, økonomisk/administrativ utdanning, sjukepleiarutdanning, lærarutdanning, og maritim utdanning.
Det at unge menneske brukar år av sitt liv til å byggja kunnskap og dugleikar som er avgjerande viktig for utviklinga av privat og offentleg verksemd, fyller samtida med håp for framtida.
Men det å vera student er meir enn å utdanna seg til arbeid. Det er ei tid for danning, ei tid der mange vert forma som menneske i samspel med omgjevnadane.
I tider der demokratiet er pressa og konfliktnivået i samfunnet aukar, er engasjement og deltaking eit grunnpremiss for samfunnsutviklinga. I HVL arbeider me aktivt for at demokrati og medverknad skal kjenneteikna høgskulen og vera viktige deler av identitet og styreform.
Det vil koma dagar med oppturar og nedturar. Eit raust og inkluderande studie- og læringsmiljø gir rammer for å handtera både det gode og det vanskelege.
Det vil koma dagar med oppturar og nedturar. Eit raust og inkluderande studie- og læringsmiljø gir rammer for å handtera både det gode og det vanskelege.
Engasjement i undervisning, på lab, i praksis og i arbeidsliv byggjer kunnskap og karakter. Deltaking i forsking gir forståing for vitskap. Aktive studentforeiningar er basis for eit godt studentmiljø.
Deltaking i studentdemokratiet gir grunnlag for at studentane si røyst får gjennomslag. Studentdemokratiet er kime til demokratisk utvikling i Noreg.
HVL verkar inn på arbeidslivet nasjonalt og internasjonalt. Med fleire studiestadar i bygd og by på Vestlandet er det i denne delen av Noreg studentane og kandidatane våre har størst innverknad. Medvite samarbeid er avgjerande.
Arbeidslivsorienteringa fordrar stadig fornying av samarbeid og avtalar med offentlege og private verksemder.
Studiestadane våre i Bergen, Haugesund, Sogndal, Sunnfjord og Stord, treng dei aktive og attraktive vertskommunane. Studentsamskipnaden Saman er grunnleggjande viktig for den gode studentvelferda. Utestadar, butikkar og private utleigarar som tilbyr studentar skikkelege vilkår, bidreg til det gode studentlivet og gjer studiestadane våre meir attraktive.
Studiestart er høgtid i høgskulen. Studentar og tilsette har gjort omfattande førebuingar. Men det å bli kjent med og kjenna seg velkomen på ein ny studiestad gir eit eineståande grunnlag for tryggleik og trivsel.
Difor; ei stor takk til kvar og ein som bidreg til at studentane våre trivst og lukkast.
Lat oss saman gjera studiestart 2025 til den beste studiestarten.
Vel møtt til studieåret 2025—2026 og hjarteleg til lukke alle saman!
