Slutt på skriftleg eksamen for ex.phil.-studentane

Examen philosophicum, kjent som ex.phil., har fleire hundre år lange tradisjonar som førebuande danningsfag. Like lenge har skriftleg eksamen vore ein del av pakken.

No er det slutt — i alle fall i Tromsø. Frå hausten av skal 1700 studentar vurderast gjennom munnleg eksamen, og berre det.

— Det er eit radikalt steg å ta, men det er nødvendig, seier leiar ved Institutt for filosofi og førstesemesterstudier ved UiT Noregs arktiske universitet, Melina Duarte.

Det er kunstig intelligens (KI) og språkmodellar som ChatGPT som ligg bak.

I ein kronikk i Khrono skriv Duarte:

«Mange av våre studenter opplever et press til å bruke KI for å oppnå bedre karakter på skriftlige oppgaver. Selv når sensorene ikke belønner standardiserte svar (helt motsatt), ser vi og studenter hvordan KI kan gi tekster som er glatte, velstrukturerte og overbevisende uten at det nødvendigvis reflekterer studentens egen forståelse».

Debatt ● Melina Duarte

Ex.phil. for fremtiden etter KI

Vil halde på skrivinga

— KI har allereie revolusjonert høgare utdanning, og vi har endra eksamensform i ei rekke av programma våre. Når det gjeld filosofi, er det svært viktig at studentane lærer å skrive. Derfor vil vi halde på essay-skrivinga som ein viktig del av kurset, utdjupar Duarte til Khrono.

Ho meiner den tradisjonelle semesteroppgåva har utspelt si rolle, og at mange studentar kjenner seg pressa til å bruke KI for å oppnå betre karakterar på skriftlege oppgåver. I staden vil dei i Tromsø frikople skrivinga frå eksamen og på den måten prøve å få fokus over på tenking og tolking, det som faktisk skal øvast opp.

— Vi vil prøve å senke presset, men halde på skrivinga, utan at det skal vere knytt til karakter, seier Duarte.

Ho legg til at den aukande arbeidsbelastninga for dei tilsette også er ein viktig faktor bak omlegginga. Som følgje av KI-revolusjonen har stadig meir tid gått med til å vere «kjeldedetektivar» for å avdekke spor frå språkmodellane i eksamensoppgåver.

— I staden for meir overvaking og kontroll, der lærarar blir til politi, vil vi ha vurderingsformer med menneskeleg dømmekraft i sentrum. For studentane tar vi bort eit insentiv til å ta ein uheldig snarveg i arbeidet.

EKSAMEN

UiT vurderer å kamera­overvåke hjemmeeksamen

— Dempe prestasjonsangsten

Der er ein lang tradisjon for munnleg eksamen ved Tromsø-varianten av ex.phil. Men med utvikling av nettbaserte tilbod har det blitt mindre av dette. No skal også dei som tar ex.phil. digitalt, testast munnleg med digital løysing.

— Det er ikkje snakk om den heilt tradisjonelle typen munnleg eksamen, der ein trekker ut eit emne litt som i eit lotteri. Vi vil ha meir plass til å la studenten definere eksamen sjølv. Munnleg eksamen er krevjande, og vi ønskjer å dempe prestasjonsangsten og heller styrke prestasjonen. I ein del av eksamen skal studenten få presentere noko dei har skrive om, seier Duarte.

Munnleg eksamen, på same måte som skriftleg, passar nokre studentar betre enn andre. Dette har dei tenkt på i utarbeidinga av den nye modellen, ifølgje instituttleiaren.

— Det er fleire ting å tenke på her, og med munnleg eksamen må vi vere litt forsiktige. For eksempel kan denne forma favorisere dei ekstroverte studentane. Det kan vere ei hindring for dei som ikkje har norsk som morsmål. Vi vil gjere det mogleg å legge til rette for andre typar gjennomføring av eksamen når det krevst, seier ho.

— Munnleg eksamen er ressurskrevjande, men vi meiner denne eksamensordninga legg betre til rette for utviklinga av dei eigenskapane vi ønsker å gi studentane enn billigare alternativ, legg ho til.

Kunstig intelligens

KI-utvalg vil teste bruk av kunstig intel­ligens i eksamens­sensur

Aktuelt tema i Oslo

Det er ikkje berre i Tromsø det kan bli endringar i vurderingsformene for ex.phil. Også ved Universitetet i Oslo (UiO) ligg det an til endringar.

— Kva eksamensform vi bør bruke, er eit aktuelt tema hos oss, seier Pål Fjeldvig Antonsen, leiar ved Institutt for filosofi, ide- og kunsthistorie og klassiske språk.

Det er to variantar av ex.phil. ved UiO, seminarvarianten og sjølvstudiumvarianten. Sjølvstudiumvarianten har skuleeksamen, og seminarvarianten kombinerer heimeeksamen med semesteroppgåve.

— Vi er medvitne om at eksamensforma vi har i dag blir utfordra av kunstig intelligens. Vi vurderer munnleg eksamen, men det må kombinerast med noko anna for å sørge for at studentane får skrivetrening, seier Antonsen.

EKSAMEN

Eksamener legges om: Her ble det holdt 200 flere muntlige eksamener

Færre heime­eksamenar

Ei kartlegging som Khrono gjorde i haust, viste at det er ei klar dreiing ved universiteta mot færre heimeeksamenar og fleire munnlege eksamenar og skuleeksamenar. UiT Norges arktiske universitet hadde i  2024/25 over 200 fleire munnlege eksamenar enn studieåret før.

Universitetet lengst i nord har, som Khrono har skrive før, den siste tida testa ut ei rekkje ulike nye måter å gjennomføre eksamen på. Kameraovervåking av heimeeksamen er ei vurderingsform som er blitt utforska, ei anna inneber å fjerne eksamen heilt.