Varslar opprør mot «pause» for logoped­­utdanning. — I praksis ei rasering

2026-kullet ved logopediutdanninga ved Universitetet i Bergen (UiB) kan bli det siste. Det fryktar Norsk logopedforbund (NLF) og studentar, som har sett i verk ein underskriftskampanje i håp om å redde studiet.

— Dette er i praksis ei rasering av eit samfunnskritisk fagmiljø og ei utdanning som er blitt bygd opp over 20 år, seier leiar for NLF, Katrine Kvisgaard, til Khrono.

I eit ekstraordinært møte sist veke gjorde styret ved Det psykologiske fakultet — med 7 mot 4 stemmer — vedtak om å setje opptaket til masterprogrammet i Logopedi «på pause i 2026» og «å omdisponere 22 studieplassene som hører til masterprogrammet i logopedi midlertidig til følgende program i 2026».

«Kostnader i forhold til inntekter»

Ifølgje fakultetet er målet å gi «fagmiljøet nødvendig handlingsrom til å utrede alternative modeller for videreføring», i tillegg til å «kvalitetssikre beregningsgrunnlaget for økonomiske rammer for programmet».

— Å setje utdanninga på pause vil føre til at ein mistar nøkkelpersonar og relevante praksisrettleiarar og kontakten med helseføretaka. Vi veit av erfaring at det er lett å setje ein strek over eit lite fag. Vi har kjempa den same kampen ved NTNU og UiT Noregs arktiske universitet, seier Kvisgaard.

Det har så langt ikkje lukkast Khrono å få kommentar frå dekan Stine Lehmann ved Det psykologiske fakultet.

Ifølgje saksframlegget til fakultetsstyret som er grunnlag for vedtaket, har masterprogrammet i logopedi over tid «hatt god søkning, akseptabel gjennomføring og høy arbeidslivsrelevans», i tillegg til å «dekke et tydelig samfunnsbehov innen logopedifeltet».

Problemet er, ifølgje fakultetsleiinga, «kostnader i forhold til inntekter».

— Det er vanskeleg å sjå korleis fagmiljøet skal kunne lage ein plan for vidare drift, når nettopp manglande ressursar er grunngivinga for å legg utdanninga på is, seier Kvisgaard.

Ho legg til at stans i utdanninga av logopedar i Bergen vil ramme brukarane hardt.

— Det vil få direkte konsekvensar for brukarane i kommunane og spesialisthelsetenesta på Vestlandet.

Student:— Lyn frå klar himmel

Også studentane slår alarm.

— Dette kom som lyn frå klar himmel, eit sjokk, på oss studentar, seier logopedstudent Tooraj Barhag.

Han varslar opprør mot vedtaket. Ein underskriftskampanje er i gang og måndag morgon sende studentane bekymringsmelding til rektor ved universitetet. Brevet er signert av 31 studentar frå to kull.

Barhag seier at studentane til liks med logopedforbundet er redd nøkkelpersonale og praksisplassar kjem til å gå tapt med ein «pause».

— Då kan det bli umogleg å starte dette opp igjen. Det ser ut som ei styrt avvikling av eit lite og sårbart, men samfunnskritisk fag, seier han.

Ifølgje Barag er mangelen på logopedtenester godt dokumentert av Riksrevisjonen og Helsedirektoratet.

— UiB er det einaste utdanninga skreddarsydd for jobb i tverrfaglege medisinske team. Dette skil seg frå dei andre logopedutdanningane med spesialpedagogikk i botn, seier han.

Reagerer på prosess

Både studentane og Norsk logopedforbund er sterkt kritiske til prosessen.

Dei tilsette vart ifølgje NLF-leiar Katrine Kvisgaard innkalla til eit orienteringsmøte to dagar før det ekstraordinære fakultetsstyremøtet med «logopedi og veien videre» som tema. I møtet fekk dei presentert to forslag: anten å halde fram utan fleire ressursar, eller setje utdanninga på pause.

— Det vart opplevd som eit ultimatum. Dei tilsette har lenge varsla om at utdanninga ikkje kan halde fram dersom ikkje nødvendige stillingar blir erstatta. Vi meiner det har vore svært mangelfulle og lite gjennomtenkte prosessar bak vedtaket.

Ifølgje Tooraj Barhag er studentane ikkje blitt tatt med på råd.

— Vi reagerer sterkt på at vedtaket vart gjort heilt utan at studentane blei involvert, seier han.

No er håpet at universitetsstyret ved Universitetet i Bergen skal setje foten ned på sitt møtet 5. februar.